Comecei neste mundo cando me regalaron unha guitarra e a desmontei enteira, volvina armar e empecei a facerlle perrerías. Iso sería cando tiña uns 17 anos. Despois fun buscando información en libros e dando o coñazo a outros luthiers maiores para que me ensinasen, visitando talleres… e ao final logrei entrar a traballar por momentos con algúns luthiers. En 1981 contratáronme nun local que era estudo, tenda e taller, e alí estiven 2 anos; despois diso montei o meu primeiro taller, e a partir de entón traballei de maneira independente. O primeiro taller monteino na casa, e en 1991 abrino por primeira vez ao público.
Desde entón tiven cinco talleres, contando este no que estamos agora, na nave situada na N-525 en As Cruces, no coñecido concello de Allariz, na provincia de Ourense.